पाथळ अर पीथळ

अरै घास री रोटी ही जद बन बिलावडो ले भाग्यो । 

नान्हो सो अमरयो चीख पड्यो राणा रो सोयो दुख जाग्यो ।

हूं लडयो घणो हूं सहयो घणो 

मेवाडी मान बचावण नै ,

हूं पाछ नही राखी रण में 

बैरया रो खून बहावण में ,

जद याद करू हळदी घाटी नैणा मे रगत उतर आवै ,

सुख दुख रो साथी चेतकडो सूती सी हूक जगा ज्यावै ,

पण आज बिलखतो देखूं हूं 

जद राज कंवर नै रोटी नै ,

तो क्षात्र - धरम नै भूलूं हूं 

भूलूं हिंदवाणी चोटी नै

मेहलां में छप्पन भोग जका मनवार बिना करता कोनी ,

सोनै री थाळयां नीलम रै बाजोट बिना धरता कोनी ,

अै हाय जका करता पगल्या 

फ़ूला री कंवरी सेजां पर ,

बै आज रूळे भूखा तिसिया 

हिंदवाणै सूरज रा टाबर ,

आ सोच हुई दो टूक तडक राणा री भीं बजर छाती ,

आंख्यां मे आंसू भर बोल्या मैं लिख स्यूं अकबर नै पाती ,

पण लिखूं किंयां जद देखै है आडावळ ऊंचो हियो लियां ,

चितौड खडयो है मगरां मे विकराळ भूत सी लियां छियां ,

मैं झुकूं कियां ? है आणा मनै 

कुळ रा केसरिया बानां री ,

मैं बुझूं किंयां ? हूं सेस लपट 

आजादी रै परवानां री ,

पण फ़ेर अमर री बुसक्यां राणा रो हिवडो भर आयो ,

मैं मानूं हूं दिल्लीस तनै समराट सनेसो कैवायो । 

राणा रो कागद बांच हुयो अकबर रो सपनूं सो सांचो 

पण नैण करयो बिसवास नहीं जद बांच बांच नै फ़िर बांच्यो ,

कै आज हिंमाळो पिघळ बह्यो 

कै आज हुयो सूरज सीटळ ,

कै आज सेस रो सिर डोल्यो 

आ सोच हुयो समराट विकळ ,

बस दूत इसारो पा भाज्या पीथळ नै तुरत बुलावण नै ,

किरणां रो पीथळ आ पूग्यो ओ सांचो भरम मिटावण नै ,

बी वीर बाकुडै पीथळ नै 

रजपूती गौरव भारी हो ,

बो क्षात्र धरम रो नेमी हो 

राणा रो प्रेम पुजारी हो ,

बैरयां रै मन रो कांटो हो बीकाणूं पूत खरारो हो ,

राठौड रणां मे रातो हो बस सागी तेज दुधारो हो,

आ बात पातस्या जाणै हो 

घावां पर लूण लगावण नै ,

पीथळ नै तुरत बुलायो हो ,

पण टूट गयो बीं राणा रो 

तूं भाट बण्यो बिड्दावै हो ,

मैं आज तपस्या धरती रो मेवाडी पाग़ पग़ां मे है ,

अब बात मनै किण रजवट रै रजपूती खून रगां मे है ?

जद पीथळ कागद ले देखी 

राणा री सागी सैनाणी ,

नीवै स्यूं धरती खसक गई 

अंाख्यां मे आयो भर पाणी ,

पण फ़ेर कही ततकाल संभल आ बात सफ़ा ही झूठी है ,

राणा री पाग़ सदा ऊंची राणा री आण अटूटी है ।

ल्यो हुकम हुवै तो लिख पूछूं 

राणा ने कागद खातर ,

लै पूछ भलांई पीथळ तूं 

आ बात सही बोल्यो अकबर ,

म्हे आज सुणी है नाहरियो 

स्याळां रे सागे सोवैलो ,

म्हे आज सुणी है सूरजडो 

बादळ री ओटां खोवैलो ,

म्हे आज सुणी है चातकडो 

धरती रो पाणी पीवैलो ,

म्हे आज सुणी है हाथीडो 

कूकर री जूणां जीवैलो ,

म्हे आज सुणी है थकां खसम 

अब रांड हुवेली रजपूती ,

म्हे आज सुणी है म्यानां में 

तलवार रवैली अब सूती ,

तो म्हारो हिवडो कांपै है मूंछयां री मोड मरोड गई,

पीथळ नै राणा लिख भेजो आ बाट कठै तक गिणां सही ?

पीथळ रा आखर पढ़तां ही 

राणा री अंाख्यां लाल हुई ,

धिक्कार मनै हूं कायर हूं 

नाहर री एक दकाल हुई ,

हूं भूख मरुं हूं प्यास मरुं 

मेवाड धरा आजाद रवै 

हूं घोर उजाडा मे भटकूं 

पण मन में मां री याद रवै ,

हूं रजपूतण रो जायो हूं रजपूती करज चुकाऊंला,

ओ सीस पडै पण पाघ़ नही दिल्ली रो मान झुकाऊंला ।

पीथळ के खिमता बादळ री 

जो रोकै सूड़ ऊगाळी नै ,

सिंघा री हाथळ सह लेवै 

बा कूख मिली कद स्याळी नै ?

धरती रो पाणी पिवै इसी 

चातग री चूंच बणी कोनी ,

कूकर री जूणां जिवै इसी 

हाथी री बात सुणी कोनी,

आं हाथां मे तलवार थकां 

कुण रांड कवै है रजपूती ?

म्यानां रैै बदळै बैरयां री 

छात्यां मे रेवै ली सूती ,

मेवाड धधकतो अंगारो आंध्यां मे चमचम चमकैलो,

कडखै री उठती तानां पर पग पग खांडो खडकैलो ,

राखो थे मंूछयां एठयोडी 

लोही री नदी बहा दंयूला ,

हूं अथक लडूंला अकबर स्यूं 

उजड्यो मेवाड बसा दयूंला ,

जद राणा रो संदेशो गयो पीथळ री छाती दूणी ही ,

हिंदवाणो सूरज चमकै हो अकबर री दुनियां सूनी ही ।
ThE UlTiMate FiGhTeRs Of RaJpUtAnA